Scoil Náisiúnta Mhic Dara

Fáilte chuig suíomh idirlín na scoile. Is bunscoil Ghaeltachta, Chaitliceach í Scoil Mhic Dara atá faoi phátrúnacht Ardeaspag Thuama. Nuair a osclaíodh an scoil sa bhliain 1956, creidtear go raibh sí ar an scoil tuaithe ba mhó sa tír ag an am. Sároideachas a chur ar fáil don phobal ba bhunchuspóir leis an scoil ó lá a bunaithe agus is amhlaidh atá an scéal inniu.

​

Tá sé mar aidhm againn timpeallacht dhearfach, aoibhinn, fháiltiúil, chuidiúil a chothú sa scoil, ina mbeidh fáilte roimh gach duine. Is í an chloch is mó ar ár bpaidrín ná go mbeidh oideachas leathan Críostúil ag na daltaí a bhíonn faoinár gcúram, le go mbeidh siad in ann páirt éifeachtach, iomlán a ghlacadh sa saol amach rompu. Déantar forbairt iomlán ar iltréithe an dalta agus aithnítear cumas agus riachtanais éagsúla gach gasúr.

​

Faoi láthair, tá thart ar 200  dalta ag freastal ar an scoil agus tá dáréag múinteoirí, cúntóir riachtanas speisialta, rúnaí agus airíoch scoile ar an bhfoireann. Bíonn an scoil gníomhach i réimse leathan imeachtaí spóirt is cultúrtha.

I measc na bhforbairtí tábhachtacha ó thaobh achmhainní scoile le blianta beaga anuas, tá ríomhlann, cláir bhána idirghníomhacha sna ranganna ar fad agus athchóiriú halla agus pháirc na scoile.

​

Bain sult as do thuras thart ar an suíomh idirlín.